La Usc di Ladins

Ence chest an l Museo Ladin de Fascia à metù a jir i »Dis de la Didatica«. Dai 23 ai 27 de otober te la sala Heilmann, cercené dai bie jeghes de la mostra che à abù gran ejit chest istà, l é stat endrezà scomenzadives con chela de seghitèr a portèr inant la fona colaborazion con ensegnanc, educatores e genitores de Fascia per sostegnir l lurier de valorisazion de la cultura ladina, descheche podede lejer chiò apede.

Do la scontrèdes più leèdes a la scola e ai operadores de la formazion, en vender ai 27 de otober l envit é stat slarià fora a duta la comunanza per la prejentazion del liber »Jeghes, jech e marevees«, na publicazion leèda apontin a la mostra sul jech metuda fora ti meisc passé te Museo e serèda su en chel dì. Tant la mostra che l liber é nasciui da la proponeta e da la pascion de la scritora Brunamaria Dal Lago Veneri e de sia amica colezionista Sara Gori, ma ence dal lurier ascort e competent de esposizion e catalogazion de la responsabola del Museo Daniela Brovadan e de dut l staff de la Majon di Fascegn che à tout su con gran gaissa chest projet.

La mostra à permetù ence de strenjer l leam con Gherdena, de gra a la familia Sotriffer, che a Ortijei à metù su la firma Anso e amò ades l’à na bela boteiga de jeghes. Te sala l era Michela Sotriffer, che é stata rengrazièda con n gran batiman per aer metù a la leta n muie de jeghes per l’esposizion fascèna. L leam anter la valèdes ladines se concretisèa te la chiena, i jeghes de legn, soraldut ciavalins, che vegnia desgrossé fora te la stues de Fascia te la seres d’invern.

Tel liber la paroles de Brunamaria Dal Lago Veneri met dant l valor del jech ence a livel filosofich e antropologich, per troèr endodanef l passà e trasmeter la memoria.
La publicazion, data fora col contribut de la Region Autonoma Trentin-Südtirol, la é per ladin e talian e travers i QR code se pel aer ence la traduzions per todesch e ingleis e i video de la intervistes de »MaJia«.

De più su La Usc de en vender ai 10 de november del 2023  (Lucia Gross)