La Usc di Ladins

L é stat chiamà ite en mèrtesc ai 31 de otober l Consei de Comun de Cianacei. Tel orden del dì desvalives ponts che é stac duc aproé, con vèlch astenjion, da man di 9 conseieres te sala con a cef l ombolt Giovanni Bernard che à despiegà bel avisa ogne pont.

l é stat rejonà di lurieres de recalificazion e valorisazion di percorsc per la rodes e per la jent enlongia Veisc da Dèlba ite. L é stat portà dant l projet preliminèr del intervent, che perveit l’aproazion te Consei per i lurieres che passa via i 500.000 euro. Da Pènt de la Ròa enscin ta Pènt de la Sia, la strèda la é de comun e belimpont chiò cognessa passèr la neva strèda per la rodes: dalajà che chiò pel passèr auti fin ta Zeli, per valorisèr l percors soraldut tel temp da d’istà, vegnarà spartì en doi la streca, resservan na pèrt a rodes e chi che va a pe, coscita da valorisèr ence l vert dintornvia Veisc. Te chest projet l é desvalives ponts delicac da studièr fora desche l traversament de la strèda per la rodes de la statala 641 e lo da Pènt da Molin.

La Sozietà Trentino Trasporti enten slarièr l garasc per i pulman ta Penìa, ampò servia l’aproazion del Consei per ge l lascèr fèr, en deroga al PRG. L é stat aproà, con 1 astegnù, ence la realisazion en deroga de n bar-ristoro nef sun Gardecia (Belvedere), en sostituzion de la tieja che l é ades.

De più su La Usc de en vender ai 10 de november del 2023

 (Nicoletta Riz)