La Usc di Ladins

Coluna él la endesfides del davegnir che i joegn hotelieres de Fascia cognarà se tor dant? Éi enjigné per ge fèr front? Per responer a chesta domanes l é stat endrezà l prum ‘Fassa Leadership Camp’, out ai joegn hotelieres dai 20 ai 35 egn de Fascia. Dai 19 ai 21 de otober n grop de 15 joegn de la val é jic a Riva del Garda olache i à tout pèrt a n workshop de lurier sun nozions e strumenc che ge permetarà de portèr inant sia atività te n mond e n marcià che muda semper più en prescia.

L cors de formazion é stat endrezà da la trei sezions ASAT de Fascia, chela de Moena col president Patrizio Prandi, chela del Zenter Fascia col president Guglielmo Lasagna e chela de la Val de Sora col president Filippo Debertol, la sociazion UNAT con Rosa Carpano e l’Apt de Fascia.

»Se aon metù ensema percheche aon dezidù de investir sui joegn – à dit l president ASAT del Zenter Fascia Guglielmo Lasagna – per ge far capir che sion a la leta per dute soe proponete. Chest l é n moment storich olache le competenze di joegn le passa via per emportanza chele di ‘manco joegn’, ic à n vantaje competitif e i cogn se n adar de chest. La maor part di imprenditores va inant desche semper ma le robe le muda en prescia. Per far n ejempie: con le neve tecnologie se podessa aer maor vadagn te nosce struture, basta demò pissar a l’inteligenza artifiziala che revoluzionarà dut nosc sistem de lurier.

I partezipanc al cors l é stat: Martina Lorenz, Pietro Baio, Luca Buono, Michele Zanoni, Gianluca Marchesoni, Damiano Nicolodi, Vanessa Winterle, Antonina Manica, Lorena Defrancesco, Igor Lastei, Matteo Pellegrin, Vistor Spinel e Chiara Chiocchetti. Ai lurieres à tout pèrt ence Guglielmo Lasagna desche responsabol e Filippo Debertol.

»L é stat na bela esperienza – ne à dit Michele Zanoni de My Time Hotels – soraldut dal pont de veduda de relazion percheche eraane de pec e sion stac bogn de lear e de aprofondir i raporc, chest l é un di valores prinzipai. Ence la part de cors la é stata enteressanta percheche aon lurà n muie sun noi enstesc per capir coche funziona nosc cervel e per svilupar miec nosce capazità.«

Ai 30 de november chest grop de joegn se troarà al Hotel X Alp de Pera per se confrontèr sun chel che l é vegnù fora dal cors.

De più su La Usc de en vender ai 10 de november del 2023

 (Monica Cigolla)