La Usc di Ladins

L Consei de Aministrazion de l’Apt de Fascia à cernù l nef president de la Sozietà Gregn Evenc te la persona de Fausto Lorenz. Do che Andrea Weiss aea dat la demiscions a la fin de otober per esser stat sfiduzià da la raprejentantes di impiantisć di Consorzies Val de Fascia-Ciareja e Lujia-Sèn Pelegrin, respetivamenter Elisa Maccagni e Alice Dellantonio, per se aer candidà con la lista »Fascegn« a l’ultima litazions provinzièles, la direzion de l’Apt à cognù se meter al lurier per troèr valgugn che se tole su l’encèria. La costion era ruèda sun desch del Esecutif jà en mercol ai 8 de november e l dì do, belapontin ansera, l Consei é ruà a na dezijion con la designazion de na persona condividuda da duc: l president de l’Apt Fausto Lorenz. La dezijion ge spetèa a l’Apt ajache l’à l 48% de la quotes de la sozietà, i doi Consorzies di impianc portamont à l 21,50% per om e i Comitac DoloMyths Run, Sellaronda Ski Marathon e Fascia Bike l 4% per om. La nomina vegnarà ratifichèda, descheche perveit l statut, da la radunanza di sozi de la Sozietà Gregn Evenc ai 15 de dezember che vegn.

»Con sens de responsabilità – à dit l president Lorenz – tole su l testamonech de Andrea Weiss e me mete a la leta per troar endodanef chela gaissa e chela fiduzia che à caraterisà, acà valch meis, la naa de la Sozietà Gregn Evenc de Fascia, de chela che noscia val à gran besegn. Ne speta apuntamenc emportanc, desche le doi gare de Copa del Mond de schi de eles dai 24 e 25 de firé sun Sèn Pelegrin, che cognon endrezar al miec, desmostran desche tel passà, duta la profescionalità e la gaissa che noscia tera é bon meter a a leta«.

Andrea Weiss ge tegn a sotlineèr che canche l é stat nominà no l aea tout nesciun empegn en merit a candidatures e per chel che vèrda la nomina del nef president l ne à dit. »Son content che i à nominà Fausto Lorenz, l é na persona de garanzia per l empegn che se à tout su l’Apt. Ades che i à nominà i pel jir inant a lurar per i apuntamenc emportanc che ge speta.«

 (Monica Cigolla)