La Usc di Ladins

L’isola de Rodi de la Grecia, chiamèda ence ‘Isola delle Rose’, se troa te la pèrt sud-orientèla del Dodecaneso. L’à na popolazion de zirca 116.000 persones su na superfizie de 77 chilometres cadrac. L cher de l’isola l é formà da trei bloches de monts: l più aut de 1.215 metres l à inom Agtàviros. Japede chisc monts l é de bie douces coi che i se spiata pian pian e i ge dèsc vita a n a bela campagna con coltivazions che rua fin su la costa del mèr.

Con nosc grop sion stac lo na setemèna, dai 14 al 21 de otober, eraane al hotel Lardos Bay, n alberch manà inant da n jon trentin da Brentonico, olache sia femena, ence ela trentina, la fèsc da compagnadora te la escurscions. L prum dì no aon fat trop ajache sion rué via da sera. L secondo dì dal paisc de Lindos son jic sul montejel de Marmari, tras na vegetazion de pins de Aleppo, roveres spinousc, zondrées de majorana e de salvia, respiran odores da marevea, en dut 12 chilometres a pe. Sunsom che jion stac, se à avert n panoram da restèr senza fià, su la baia de Navarone e su l’acropoli de Lindos. De retorn sion jic a veder la fossa de Kleovulo (un di 7 sapienc del mond antich) e l’acropoli de Lindos, passan anter la strèdes strentes e la beliscima cèses biences de chesta belota zità turistica. L dì do sion jic a pe sul Monte Akramytis, aut 850 metri, tras n bel troi, a momenc ence mingol sfadious, fin a ruèr a la picola gejia de Sèn Jan te mez a n bosch de pins. Do na picola paussa sion rué sunsom l mont, olache l color vert di èlbres se scontra col color brun de l’Egeo. Apede a la marevea de veder l’area stravardèda »Natura 2000« da colassù aon ence vedù dalenc la isoles de Karpados e Koes. Vegnir de retorn l é stat mingol più senester, ajache l troi l era mingol ert e da sasc frané ju. Do marena aon vijità l Monolithos Castle, olache anter la roines del ciastel l é amò na belota picola gejia coi mures bienc dedichèda a Sèn Gere e a Sèn Pantaleo.

De più su la raida del Cai Sat Auta Fascia su La Usc de en vender ai 10 de november del 2023

 (Maria Assunta Merli)