La Usc di Ladins

En lunesc ai 13 de november l é stat chiamà l Consei General del Comun General de Fascia.
L Conseier de procura Amedeo Valentini à prejentà l Pian organich di intervenc de politica linguistica e culturèla per l an 2024, un di momenc de maor emportanza per l Consei ajache vegn aproà l pian di intervenc te setores strategics per l sostegn a la cultura e l lengaz ladin.

Dantfora Valentini à rengrazià la responsabola Evelyn Bortolotti e dut l Ofize di Servijes linguistics e culturèi per l lurier che vegn fat.
Per ativitèdes de promozion linguistica e sozièla, capitol che tol ite la scomenzadives per l lengaz e l’identità desche l’Aisciuda Ladina, i evenc identitères desche l Carnascèr, Sènt’Ugèna, la Gran Festa da d’istà e la Festa del Rengraziament, e i contribuc a sociazions culturèles l é stat stanzià 109.000 euro.
»L é stat tout su 14 domanes de projec per la valorisazion del lengaz e l’identità ladina per en dut 62.450 euro – à spiegà Amedeo Valentini – e conzedù l sostegn finanzièl a 23 sociazions per 41.000 euro, più l contribut a la scomenzadives e projec de l’Union di Ladins de Fascia per 68.000 euro.« L Pian organich de politica linguistica che perveit contribuc en dut per 503.450 euro é stat aproà dai 17 conseieres prejenc te sala, 5 à cognù jir fora per incompatibilità. L Conseier de procura ge à sport a duc l nef codejel de ‘Entener per se fèr entener’ e l maz de chèrta fascènes.

De più su la sentèda del Consei General su La Usc stampèda de en vender ai 17 de november del 2023

 (Monica Cigolla)