La Usc di Ladins

No l é stat na gran prejenza de sozi a la radunanza de la sozietà Funivia Moena en lunesc ai 27 de november chiamada ite dal president Maurizio Sommavilla te sala Simonin Maza de le scole. I sozi à raprejentà l 47% del capital con 1.667.000 euro de quote di prejenc e 24.000 euro con le deleghe. Epura l president à metù en consaputa che la data de la gara de apalt é più che mai segura e vejina e, ensema a la vizeombolta de Moena Cristina Donei, l à domanà che i sozi sie promotores de maor gaissa anter la jent percheche »oramai no podon più se tirar en do, sion beleche ruè a la fin, cognon portar a ciasa chest impiant che sarà la spenta per n nöf entusiasm per dut l paes de Moena.«

L l’à chiamada »na partida a scaches contra la burocrazia«, la longia storia del impiant portamont Moena-Valbona enviada via de mé del 2013 col prum comitat promotor. »Aon semper tegnù n profil bas – à dit Sommavilla – percheche aon semper volù uzar fora demò i fac concrec, me è dat ju trop, no scone che l é stat ence momenc de crisa e de dejilujion, ma ades sion do che ruon al obietif e no podon molar.«

De più su La Usc stampèda de vender al prum de dezember.  (Monica Cigolla)