La Usc di Ladins

I momenc gustegoi de condivijion se enterza a chi più sceri, tel grum de scomenzadives che la sociazion ladina à endrezà e endreza te chest ultim temp del an; anter i ultimes l é stat l laboratorie ta Penìa per enjignèr la corones de Avent.
Chesta domenia ai 3 de dezember ve speton da les 4 domesdì te Ciasa de Comun de Sèn Jan, olache con l intervent de esponenc del moviment ladin da Fascia e da autra valèdes vegn rejonà de l’arpejon che ne à lascià Ezio Anesi e de coche se pel la valorisèr e la portèr inant. Te chesta ocajion l nef liber »Ezio Anesi, na vita per sia comunanza« metù ensema da la sociazion tel 30° cedean de la mort del prum conseier e senator fascian, l vegn dat fora debant a duc.

En domenia vegnarà ence avert la litazions per renovèr l Consei de l’Union di Ladins. Duc i sozi en regola col tesserament pel litèr e se candidèr per fèr pèrt del nef Consei, e i à derit de aer na publicazion en don e l rebas sun duc i prodoc culturai de l’Union di Ladins de Fascia. No mencià!

Corones de Avent con Teresa dal Vera
Beleche na trentina de persones de ogne età (l più picol l é stat te bagherle a se pussèr), à tout pèrt a la terza edizion del laboratorie de la Corona de Avent. Ence chest an l’Union di Ladins de Fascia de gra a la desponibilità de Teresa Dantone de la Lis dal Vera l’à endrezà chest moment gustegol.

Podede lejer dut su La Usc stampèda de vender al prum de dezember.