La Usc di Ladins

La gejia de Soraga se à empienì de jent en jebia ai 28 de dezember per l Conzert da Nadal. Chest an l conzert é stat endrezà dal Coro Nosc che à slarià fora l envit a la Corala Sènc Piere e Paul. Vidé dal maester Peter Decrestina e con la bela prejentazion de Ilaria Petrone, i ciantores del Coro Nosc à portà dant n repertorie de ciantie da Nadal con toc per talian desche »Tu scendi dalle stelle«, per todesch con »Stille Nacht, heilige Nacht« e ence per ladin con la ciantia de Luigi Canori »Te cianal de legn«.

La Corala enveze, vidada dal maester Michele Pellegrin e compagnada al piano da Svetlana Kozynska, à prejentà ciantie religiouse e popolare e i ne à menà tel spirit più sćiantif de la maor festa religiousa del an.

La Corala, che dombra na ventina de ciantore e ciantores, prejentada da Maria Ghetta, à avert sie conzert con »Adeste fidelis« na ciantia da Nadal per latin de la metà del 1700, e dapò l’à ciantà »Quando il Signore verrà« de Monsegnor Pierangelo Sequeri, »Dolci campane a Natale«, na ciantia tradizionala todesćia e autres toc popolares su la pasc e la nasciuda del Bambinol.

Con le ciantie »La Pastorale di Couperin« de Antonio Allegra e »Stella appar« de Franz Gruber e elaborazion de Corbetta, con na strofa per talian, una per todesch e una per ladin, i à volù ge sporjer a duc i più bie augures de n Bon An nef 2024.

Con chest conzert l é stat tirà su bonaman per la sociazion Helambu Arcobaleno che se dasc ju per ge portar didament a la jent de la region del Helambu tel Nepal. De chesta sociazion fasc part ence Alessandro Pederiva da Soraga che ogne an va tel Nepal per didar a meter a post ciase, bosserlaic e struture de prum besegn. La sociazion ge à endrezà n ambulatorie medich e na scola percheche, descheche à dit l president Giuseppe Dallavalle, demò con l’istruzion chela jent pel se arsegurar n davegnir. L conzert l é stat na bela ocajion per conjobiar le ciantie da Nadal con la solidarietà.  (Monica Cigolla)