La Usc di Ladins

L’emozion é stata forta en sabeda ai 13 de jené te La Gran Ciasa de Soraga, canche la Majon di Fascegn à portà dant l terzo numer de la regoeta »Jent de Fascia«.

Do Pare Frumenzio Ghetta e la Lis dal Vera, chest’outa la persona cernuda l é stat Don Gigi Vian, l preve da Valongia nasciù del 1925 e mort del 2016, che te sia vita l se à semper dat ju per didèr la persones en dificoltà, daperdut olache i lo à manà.

Emozion palesèda prum de dut da la ousc de Alberta Rossi de la Biblioteca del ICL, tel prejentèr la sera che se à avert col salut del ombolt de Soraga Valerio Pederiva e con la paroles de la presidenta del Istitut Cultural Ladin Lara Battisti. La Presidenta à sotrissà l’emportanza de chisc projec che dèsc l met de creèr colaborazions col teritorie. Te chest cajo con la Cèsa de Paussa, olache de otober l era stat portà dant la raprejentazion teatrèla dedichèda a Don Gigi, che proprio te l’APSP de Fascia l é stat ghest ti ultimes egn de sia vita, ma ence con la Scola, per realisèr l calandèr ladin dedicà al preve da Valongia coi retrac luré fora dai studenc, che i à ence scutà e scrit ju la intervistes de Don Gigi, per l cognoscer miec e per poder realisèr l toch de teater e l libret dediché a sia vita.

L terzo libret de »Jent de Fascia«

L à n format picol e lijier de zirca 50 piates, n test tant per talian che per ladin scrit da Alberta Rossi e traslatà da Sabrina Rasom e de bie dessegnes fac da la joena artista da Pancià Consuelo Bonet. L libret »Don Gigi Vian«, terzo numer de la regoeta »Jent de Fascia« che l ICL con sia Biblioteca dèsc fora vigni an, l à la medema carateristiches e i medemi obietives di prumes doi numeres: ge ruèr apede a na vida sorida e gustegola a duta la comunanza de Fascia, pean via dai picoi e dai joegn, per slarièr fora la cognoscenza de persones che merita de vegnir recordèdes.

La raprejentazion teatrèla e la prejentazion del codejel vegnarà porté dant amò na outa chesta sera, sabeda ai 20 de jené, semper da mesa les nef da sera te La Gran Ciasa de Soraga.




 (Lucia Gross)