La Usc di Ladins

Apede ai dac del moviment demografich de Fascia del an 2023, su La Usc de en vender ai 26 de jené aon metù apede desche semper i dac sui picioi vegnui adalèrch anter la fin e l scomenz del an.

L ultim sentadin fascian nasciù del 2023 l é ruà adalèrch te ospedèl fora Ciavaleis ai 30 de dezember da les 18.58 e l é da Cianacei. Ai 4 de jené, canche i é rué de retorn dal ospedèl te sie paisc, la mère Nadia Vinante e l père Edoardo Cuscito i à registrà te Comun i picol Enea Cuscito Vinante, a chel che ge é stat dat duc doi i cognomes di genitores.
A Moena enveze l é da ge dèr l benvegnù a la pruma sentadina de Fascia nasciuda del 2024. Defat ai 31 de dezember Katrin Sommariva la é jita fora l’ospedèl de Ciavaleis, la se à passà donca la net de Sèn Salvester tel partiment de ostetricia e l dì de Nanef, da les 18.07, l é ruà la picola Victoria Krasniqi, per la legreza de la mère Katrin, del père Enkele e de duc chi de cèsa.
A chisc doi picioi e a duc i etres rué adalèrch i augures de cher de dut l bon!


 (Lucia Gross)