Da pech l é vegnù fora n studie de la Fda (Food and drug administration), la verscion americhèna de noscia Aifa (Agenzia talièna de la medejines) sul consum e l sfrelaus de medicamenc. Aldò de la Fda sion gregn consumadores de piroles soraldut do i 60 egn, tant che un consumador sun 10 n pèra ju più che 10 en dì. Ma les duron mèl percheche te presciapech l 40% di caji lascion su la terapies inant del temp opura se desmention de les tor. Amò apede una pirola sun diesc la rua te bidon, percheche la industries seghita a vener confezions massa ‘large’ o massa ‘smart’ respet ai dis de terapia che l é de besegn. Fda ne disc ence che l 95% de chel gran maraut de medejines jites fora che empienesc nesc armeres les fajessa amò efet ence do amò passa n an. Adertura tel 25% di caji les resta atives ence do passa cater egn. Ma chest ben segur no vel dir che podon durèr piroles e sciropes scadui desche se fossa pic, percheche sie efet sorafora i termins de scadenza depen semper da coche i vegn conservé, enveze vèlch prodot no se pel assolutamenter l durèr do che l é jit fora.
Nos aon volù n saer de più e aon domanà fora l joen spezièl Giovanni Rizzi de la Farmacia San Giovanni a Vich.
Podede lejer l'intervista su la Usc stampèda de en vender ai 16 de firé.
(Monica Cigolla)
