La Usc di Ladins

Chest an la festa de Sènt’Ugèna patrona de Fascia, sul calandèr ai 16 de firé, la era l prum vender de Careisema. La dì dreta per recordèr l segnificat fon de la pratega del jajun. Per chest sun Ciaslir, te na dì maraveousa de soreie, l era dut sut: no demò la pontaa, olache no l era ne giacia ne èga che corea, no l era nience nia da beiver do messa, nia picol mesmesdì da sègra descheche vegnia fat per tradizion endèna che la Musega fajea vèlch sonèda. Per ge dèr maor forza al messaje del jajun don Andrea à defat descomanà de portèr sun Ciaslir té o brulé, e manco che manco grostoi. Na dezijion che à soscedà ence vèlch brontolament.

Ampò ence chest à didà a ge dèr segnificat al messaje che l é ruà fort e chièr endèna la messa, ofizièda da don Andrea ensema con don Gilberto e l diacon Antonio. Tant la letura del profet Isaia che la perdicia de don Andrea aea desche argoment apontin l jajun, ma n jajun che no cogn esser demò usanza, o adertura ipocrisia, ajache no conta nia jajunèr zenza nience saer l perché, e endèna tratèr mèl i lurieranc, no se cruzièr de chi che à de besegn, fèr stritoc e ingiustizies. L jajun, à dit don Andrea, l é n percors che cogn ne didèr a renunzièr a vèlch per se conzentrèr a entener chel che serf dalbon, chel che l Segnoredie l vel da nos: chest l é l valor fon de la pratega veiora che te la Careisema ne enjigna a entener l dret segnificat de la Pèsca.

De più su La Usc stampèda de en vencer ai 23 de firé.  (Lucia Gross)