La Usc di Ladins

Dal vèlch an duc aon l met de dezider e fèr saer dantfora l tratament che ogneun de nos volessa aer tel cajo che l se troe te na condizion de sanità che no ge permet più de palesèr sia volontà. Chesta oportunità, perveduda da la Lege 219 dal 22 de dezember 2017, à inom DAT (Disposizioni Anticipate di Trattamento) e la é cognosciuda ence desche »testament biologich«. L é l frut de na batalia belebon longia, ampò la é amò pech cognosciuda. Per chest l Comun General de Fascia con si Servijes Sozièi e adum con la Provinzia e sia Azienda Sanitèra, l met a jir na scontrèda en mercol ai 3 de oril, da les 20:30 te la sala grana del Comun General. Vegnarà rejonà apontin del »testament biologich«, de la desposizions e la indicazions che palesa l voler de na persona dintornvia i tratamenc sanitères e l consens o la oposizion per envièr via n percors medich che cern na persona dantfora cò no la fossa più bona de dezider enstessa. Tolarà pèrt la dotora Cecilia Pagni, spezialista te la cures paliatives de l’APSS.  (LG)