La Usc di Ladins

Ai 24 de oril te la sala Silvestri del Departiment de Economia de l’Università de Trent l é stat chiamà ite la radunanza generèla del Consorzie BIM Adesc de Trent per l’aproazion del rendicont de gestion 2023, che se à serà su na soma de 67 milions de ressorses zertèdes e de speises empegnèdes o jà paèdes fora. 

Per i Comuns l é de gran emportanza ence l »incentivo idrico« che caraterisea l pian straordenèr del 2024: tolan su n besegn palesà da la medema aministrazions, l BIM à dezidù defat de meter a la leta de si Comuns passa 5 milions de euro per miorèr la rei de la èghes da beiver. Chesta azion, sostegnuda a na vida forta da dut l Consei Diretif, no la vel demò dèr n picol ma emportant contribut a miorèr na situazion dalbon pesoca, ma ence soscedèr la riflescion de dut l sistem teritorièl su l’emportanza de tor dant chesta costion a na vida prioritèra. En cont de chest te la scontrèda l é stat rejonà ence de modalitèdes e tempes per poder se emprevaler de la ressorses metudes a la leta.

Per chel che vèrda più avisa nosc raion, l president del BIM valèdes de la Veisc Francesco Dellantonio Tasin ne à metù en consaputa de la soma de contribut che l Consorzie à metù a la leta de la trei valèdes de Fascia, Fiem e Cembra.

De più su La Usc stampèda de en vender ai 10 de mé.  (Lucia Gross)