La Usc di Ladins

L é Lorenzo Battisti l nef president del Cai Sat Zenter Fascia. Sia nomina, al post de la presidenta ‘storica’ Christine Fontana che no podea più corir la maor encèria, é nasciuda tel chèder de na neva e forta colaborazion anter l Grop da mont e l Socors Zenter Fascia, vidà da Alessandro Furci. Chest leam e la prejenza de n bel grop de neves joegn à l obietif de ge dèr neva gaissa a chesta sezion del Cai Sat, ma ence de renforzèr l spirit e l valor del viver la mont. 

L nef diretif, de chel che seghita a fèr pèrt Christine Fontana, che é stata rengrazièda per l gran servije portà inant per n muie de egn, tol ite ben sie persones del Socors da mont, pean via apontin dal president Lorenzo Battisti, che l é menacrep e socoridor, apede che maester de schi e jà gestor de refuge.

I à jà metù sun desch doi scomenzadives emportantes: la pruma, ocajion per duc i sozi per se cognoscer e passèr na bela dì adum, la é en program en domenia ai 2 de jugn al refuge Roda de Vael e la é averta tant ai sozi che ai no sozi. Ge vel se scriver ite al più tèrt en jebia ai 30 de mé, i sozi pel l fèr con n messaje sul grop whatsapp e i etres manan na mail a sat.pozzadifassa@gmail.com o n messaje su messenger de la piata Facebook.

De più su La Usc stampèda de en vender ai 24 de mé.  (Lucia Gross)