La Usc di Ladins

No l era peà via proprio ben, l an 2023, per l Consorzie Eletrich de Poza: sui prumes meisc aea pesà amò i problemes del an dant, con la ciarestia de aga che smendraa la produzion e l cost aut de energia da cogner comprar. Ampò do i prumes 4 meisc la produzion é cresciuda, ruan a passar via a la fin del an i 24 miliogn de kWh, e l cost de l’energia l é calà. Per secodir na domana de più che 39 miliogn de kWh n é stat comprà 14.463.632. A la fin l utol del CEP l é stat de 1.424.328 euro.

I numeres del bilanz ge é stac porté dant da la responsabola aministrativa Alessandra Bugarini ai sozi, chiamé ite en sabeda ai 18 de mé te tendon de Poza, che i lo à aproà duc a una. La sodesfazion per l ejit final é stata palesada dal president Giancarlo Pederiva, che l à sotlineà che ampò l Consorzie à semper vardà de tegnir basse le tarife, ence ti momenc de maor crisa.

Pederiva à dapò rejonà de la dezijion del CEP de far crescer la part de produzion che vegn dal fotovoltaich, e en cont de chest l à anunzià che i é do a fenir de meter i tulins su la scolina de Sèn Jan e che i vegnarà metui ence su la gejia de Pera e sul oratorie de Poza.

Te chesta radunanza, à dit amò l president che aea apede ela la notara Elena Corso, l era pervedù ence na part straordenara per far n mudament al statut te la previjion de far crescer la produzion col fotovoltaich. Ampò i mudamenc al statut, à deschiarì la notara, i domana la prejenza de amancol n quinto di sozi, che i é en dut 2192, e ajache la perzentuala domanada no é stata arjonta te chesta radunanza l mudament no à podù vegnir metù en aproazion.

De più su La Usc stampèda de en vender ai 24 de mé.  (Lucia Gross)