La Usc di Ladins

Coi 17 de mé l é tacà ite la sajon da d’istà sun Sas Pordoi. La forenadoa l’à avert endondanef do la paussa e man a man, chisc dis che vegn, orirà endò ence duc i etres 33 impianc anter Fascia e Ciareja. L prum sarà la forenadoa de Ciampedie al prum de jugn, dapò chi de Dèlba-Col di Rosc e de Rodela ai 8 de jugn e a roda duc i etres coi 15 chi de jugn. L Panorama Pass dèsc l met de mudèr ogne dì destinazion per ruèr sui ponc panoramics più bie. Anter la novitèdes de chest an l é l nef percors tematich sun Bufaure pissà per la families con bec picoi ajache se passa anter operes originèles e gustegoles e olache l é ence l soul labirint de la Dolomites. Ence sun Ciampac se pel jir ge do al nef percors a tapes con box tridimensionèi con ite reproduzions de scenes de vita de la montagnoles per emparèr n muie de curiositèdes sun chesta besties e sensibilisèr gregn e picoi sul tem del respet del ambient. A chisc percorsc se jonta apede ence l nef troi ‘Anel de Or’ che te presciapech 40 menuc porta da Gherdecia sun Pordoi.

De più su La Usc stampèda de en vender ai 31 de mé.  (Monica Cigolla)