La Usc di Ladins

I é 16 i candidac che, ti desvalives livie, i à passà con bon ejit i ejames de ladin te la sescion giusta serèda su. La neva Comiscion, nominèda chest’aisciuda dal Consei General, à desche presidenta la responsabola di Servijes linguistics e culturèi del CGF Evelyn Bortolotti e con ela l era Francesca Dorich, neva componenta designèda da la Scola Ladina de Fascia, e Lodovica Dioli, confermèda dal Istitut Cultural Ladin. Aon rejonà di ejames con la presidenta Bortolotti.

Co éla jita chesta sescion?

Evelyn Bortolotti A chisc ejames à tout pèrt tant jent grana che studenc de la Scola de Fascia. L é jà dotrei outes che l é ence studenc che no i é amò al ultim an, donca te la sescion resservèda, e i proa jà tel IV an a fèr l livel B2. Chest an aon abù ence na tousa de IV^ da Fiem, che l’à fat ladin demò a la scola auta, l’à proà a fèr l livel B1 e la lo à passà belebon. Chest per mie cont l é n bel segnal, vel dir che la scola é bona de soscedèr ti studenc, tant ladins che no ladins, n sentiment de conscidrazion ti confronc del lengaz.

En vender ai 31 de mé l é stat metù a jir na scontrèda: volede mudèr vèlch te chisc ejames?
Aon volù envièr via n percors de formazion con chesta comiscion, che l’à per doi terc componenc neves, ajache l é dal 2012 che l é jit en doura l nef ejam, la lege disc che l va do l chèder comun european de referiment per la valutazion de la cognoscenza di lengac, ma defat no la é coscita. Per chest aon pissà che sie de utol cognoscer miec chest chèder de referiment e valutèr l ejam aldò di livie pervedui. L é ence da dir che chisc referimenc no i resta medemi per semper, i muda col temp, donca l ejam, la preparazion, la valutazion e ence l ensegnament del lengaz i à da vegnir man a man adaté aldò de chest chèder, ajache l é stat cernù desche referiment.

De più su La Usc stampèda de en vender ai 7 de jugn.  (Lucia Gross)