La Usc di Ladins

L é stat na gran partezipazion, a l’ultima scontrèda del Consei del Comun General de Fascia, chiamà ite en mèrtesc ai 29 de oril, a la fin de sie mandat e pec dis dant da la litazions: na partezipazion fora dal solit, sotrissèda sobito dal President del Consei Cristoforo Debertol. Al orden del dì l rendicont de la gestion 2024 e i mudamenc al bilanz de previjion per l an 2025 e per i trei egn 2025-2027 e del DUP, che i é stac con la astenscion e vèlch stima de contra da man de la mendranza.

Ampò più che i numeres, coi zirca 6 milions de arvanz de aministrazion destiné a la neva senta del CGF, critichèda da la mendranza, l é da recordèr i intervenc porté dant a la fin del Consei, che pel esser conscidré na sort de passaje de testamonech per l nef ‘Parlament de Fascia’, che scomenzarà prest sie lurier tel ent soracomunal fascian sot la vida del nef Procurador Edoardo Felicetti. Reporton donca en curt la reflescions che pel esser de utol per portèr inant con consaputa e responsabilità l lurier te chest en de noscia val, che l é n unicum te anter i enc publics, recognosciù con lege costituzionèla, descheche à recordà l Procurador Giuseppe Detomas che te dut sie mandat l à lurà per ge fèr arjonjer e concretisèr recognosciment al Comun General.

Se pel lejer dut su La Usc nr 18 dai 16 de mé: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Lucia Gross)