La Usc di Ladins

Lurèr adum no l é semper sorì, ma se l é la volontà e se é bogn de l fèr, se pel fèr trop de più. L é chel che à pissà ence la trei sezions CAI SAT fascènes, Auta Fascia, Zenter Fascia e Moena, che tel ultim temp les à renforzà sia colaborazion.
Presidenc e vizepresidenc de la trei sezions, Licia Favé e Dino Riz per la Val de sora, Lorenzo Battisti e Alessandra Baldi per la Val de sot e i neves lité Gilberto Volcan e Fulvio Chiocchetti per Moena, i se à rejonà e binà te na pruma scontrèda intersezionèla. L obietif l é chel de se troèr vigni tant, no demò per viventèr i raporc ma ence per fèr rei tel endrez de la scomenzadives, vardan de desfrutèr al miec la desvaliva competenzes che l é te vigni grop, e de proponer adum evenc desferenc zenza se sorapeèr.
La pruma gran scomenzadiva metuda a jir duc adum la é nasciuda da na idea del Grop da Moena: n trekking entorn l Sela con n percors de 40 Km. da fèr te 12 ores e 2 variantes de 23 e 13 Km. per chi manco arcedé.
Chi che vel tor pèrt i cogn se enscinuèr de fata, dant dai 15 de jugn, con n messaje WhatsApp al numer 348.5484498 per aer dapò duta la informazions.

Se pel lejer dut su La Usc nr 21 dai 6 de jugn: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.





 (Lucia Gross)