La Usc di Ladins

»Utar piata« l é l prum album ofizial di Popcorner, la band de joegn fascegn che dal 2022 se à metù adum per far musega e che da enlouta l’à seghità a viventar con legreza e con soa energia la comunanza de Fascia e man a man n publich semper più gran.

»Utar piata« l é l frut de egn de lurier, de proe e de confront, che se à concretisà te sie cianzon ogneuna con so spirit e segnificat, soa storia e so sentiment. Chisc i titoi: Melanconia, Tie Soreie, Tizar te fech, L fonch, November, Mudament. I toc, registré col didament del produtor fascian Marco Mattia, i é bogn de enterzar gaissa e manconia, ritmes feruscoi e melodie douce. Descheche palesa l titol del album, le à desche comun denominator la voa de mudar e de far valch da nef e l envit a viver a na vida percacenta, anter le persone e te n ambient da stravardar, maraveous e semper bon de soscedar emozion.

En sabeda ai 21 de jugn l grop à portà dant dal vif soe neve cianzon a La Grenz a Moena e de dezember i tolarà part a la edizion 2025 de SUNS, l festival european che da egn a Udin l valorisea gropes che fasc musega con tesć scric per lengac de mendranza del veie continent.

De più su La Usc stampèda de en vender ai 27 de jugn del 2025.


 (Thomas Zulian)