La Usc di Ladins

Martina Desilvestro, 27 egn, l’à fat l liceo d’èrt de Poza, la é cresciuda su te Fascia ma da dotrei egn en ca la stèsc fora Tieser ló che la se à maridà. L’à n fèr delicat e zevil, mingol desche si album fac a man: »dijesse che, de mestier, son artejèna«, la disc. @theblackcatcreations l é l inom de sia atività e de sia piata su instagram, olache la dombra passa 20mile followers. Per descorir sie lurier tant fora de anter, coscì da ve l fèr cognoscer, se aon scontrà n domesdì sa Valongia.

Che él »The black cat creations«?

Chesta piata la é averta su instagram del 2019 e l é stat del 2021 che é mudà chest hobby tel lurier che fae. Te la pratega, mete ensema album fotografics che rencure gio, ‘da ciaf a pe. Me cruzie de la grafica, de la composizion de le piate del album e de la spedizion. La soula roba che compre l é i dessegnes e dapodò me cruzie de personalisar vigni piata e la soracuerta.

Album de che sort?

Per i popes giusta nasciui, per le ele che speta, per i cedeans, i maridoc, per le feste del papà e de la mama. Enjigne ence n muie de album per i cians, i giac o i giaves. Na curiosità l é che da spes me vegn domanà de meter ite na piata personalisada per la bestia de ciasa ence ti album per i bec picoi.

Ti album l é ite n tassel de la vita de le persone. Chest l é un di aspec che me sà più bie. Me fegure na mare che empienesc de pensieres e fotografie n album e che te vint o trent’egn la lo vardarà fora endodanef ensema col bez vegnù gran, dalbon me empienesc l cher.

Duta la intervista su La Usc stampèda de en vender ai 27 de jugn del 2025.

 (Nicoletta Riz)