La Usc di Ladins

La comunanza de Fascia é semper stata usèda a se vardèr via e se rejer enstessa l teritorie. De chest aon testimonianza da la enrescides e dai studies de Père Frumenzio Ghetta. 
Autogoern e responsabilità del Ben Comun che se troa jà ti veiores statuc de la Comunità de Fascia e che pel ge orir la strèda a la neva gestion di dominies coletives.

»N’autra vida de aministrèr: la Frazions protagonistes del mudament« l era l titol de la scontrèda endrezèda da la Frazions de Fascia e Fiem, en colaborazion con la Sociazion provinzièla ASUC, ai 30 de jugn te chino Marmolèda de Cianacei. L enconter é stat avert dai saluc del capofrazion de Cianacei Rinaldo Debertol, dal ombolt Giovanni Bernard e dal procurador Edoardo Felicetti.
Robert Brugger, president de la sociazion provinzièla ASUC e de la Frazion de Rover Carbonare, che à ence vidà i etres intervenc, à fat dapò n chèder introdutif rejonan de na ocajion informativa de dialogh e de confront. Te sala, apede ai aministradores, l era ence capifrazion e raprejentanc de la set Frazions de Fascia e sentadins enteressé al argoment. Al zenter de la discuscion la lege 168 del 2017 che perveit n mudament statutarie emportant de la Frazions: da sogec gestores aldò del model ASUC a enc autonomes bogn de lurèr con maor efizienza e libertà.

Se pel lejer dut su La Usc nr 26 dai 11 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (Monica Cigolla)