La Usc di Ladins

Tel meis de jugn l é ruà n numer 2 de chest an de Nosha Jent, l boletin del Grop Ladin da Moena, che ampò de spes l va sorafora si confins de paisc. L codejel, che chesta outa l dombra 48 piate, l se verc con n comentar de la presidenta del Grop Ladin da Moena Angela Chiocchetti del Goti, che te chisc temepes senestres vel portar mingol de speranza. Na sezion belebon longia sui fac de la comunanza pea via con na analisa de le litazion del meis de mé, tel Comun de Moena ma ence tel Comun General de Fascia. Troon dapò na lingia de articoi de informazion, reflescion e curiosità.
L boletin Nosha Jent vegn metù ensema col contribut de desvalive persone, e duc chi che à gust de scriver per ladin i é benvegnui. L vegn fora cater oute al an, de marz, jugn, setember e dezember e duc i sozi de l'Union di Ladins de Fascia che i lo domana i pel l ciapar debant en format pdf per mail, o aer l codejel stampà a ciasa con demò 5 euro de contribut per dut l an. Per ogne informazion se pel scriver a noshajent@ladinsdefascia.it o a union@ladinsdefascia.it, o chiamar te ofize de l'Union al numer 0462 764545.

Se pel lejer dut su La Usc nr 26 dai 11 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.


 (LG)