La Usc di Ladins

»Genius – Leonardo da Vinci anter èrt e scienza« l é la mostra scientifica che te chest 2025 viventea la proponeta culturèla del istà te Fascia, portan dant a na vida originèla la fegura del genio universal, simbol de la Tèlia tel mond. L percors tematich, metù fora te la aules de la scola populèra de Vich, l é stat ideà fora per l an de scola da la classes 3 LSA del Liceo scientifich e 3 LAF del Liceo artistich de Sèn Jan, col didament di dozenc soraldut de materies scientifiches e de èrt. 
Per l istà i desć espositives i é stac tout endò te man dai joegn de la Coprativa sozièla Inout e adaté soraldut a n publich de bec e families en vacanza, con l’introduzion de na pèrt laboratorièla interativa, con cunsć e jeghes curiousc per picoi e gregn. 
La sezion aurea, i poliedres platonics, la topologia di gropes, la zità ideèla l é demò valgugn anter i temes che se pel troèr tel alestiment, porté dant semper a na vida gustegola e frescia da joegn del teritorie che ogne dì compagna i ghesć te sia vijites vidèdes.
La proponetes de stamp scientifich de Inout, endrezèdes en colaborazion co la Scola Ladina de Fascia e col Comitat Vich Events e col sostegn de la Cassa Raiffeisen, les sarà a Vich a la leta del publich enscin a vender ai 22 de aost. Informazion e detaes se pel i troèr sul sit www.inoutfassa.com

Se pel lejer dut su La Usc nr 26 dai 11 de messèl: sul sfoi stampà che se pel troèr ence te la boteighes de sfoes de la valèdes ladines o sul pdf per i aboné al e-paper.




 (Thomas Zulian)