La Usc di Ladins

L é tacà ite con la metà de messèl, tel pien de la sajon da d’istà, i lurieres a Sèn Jan per refèr l Pont de Lejia. Se trata de n’opera del Servije Operes Stradèles e Feroviaries de la Provinzia de Trent che ge à dat su a la firma Cunaccia Bruno srl de Strembo, venjidora de la gara de apalt, l intervent per meter a post e slarièr l pent sun stradon. Chesta firma ge à dat su en subapalt i lurieres a la firma S.T.E. de Moena che ai 18 de messèl passé à avert l cantier. Endèna i é do che i laora per slarièr l’utèda sun strèda de Sèn Jan sul crousdevia tedant l alberch San Giovanni, vegn tout via n toch de riva e taà ju i èlbres sotite cortina e ló dal pent i à tacà a fèr perforazions tel teren.
»Per chel che varda l Pont de Lejia – ne à dit l ombolt de Sèn Jan Giulio Florian - endana i é do che i laora sotite ma coi 8 de setember l vegnarà serà fora deldut al trafich per trei meisc, fin ai 8 de dezember, per far i lurieres che l é de besegn per l slariar, far l marciapé e l nef troi per le rode che passarà sotite pont. Canche vegnarà serà fora l pont, dut l trafich vegnarà fat passar sun pont de Pantl donca su e ju per strada Neva e strada de Sèn Jan.

De più su La Usc stampèda de en vender ai 8 de aost del 2025  (Monica Cigolla)