La Usc di Ladins

La Jonta regionèla l’à aproà entadì l Pian programatich per l an 2025 dedicà a la scomenzadives de promozion e valorisazion di gropes linguistics regionèi, aldò de na proponeta del assessor regionèl a la mendranzes linguistiches Luca Guglielmi. L Pian rua do che la Region Trentin Südtirol l’à tout su l nef regolament per meter en doura la lege regionèla dai 24 de mé del 2018, n. 3, che l’à defenì endò a na vida organica e percacenta l sistem de sostegn a favor de la mendranzes linguistiches zimbra, mochena e ladina. N chèder agiornà che dèsc l met de renforzèr i struments normatives e operatives a la leta per l stravardament e la promozion de la comunitèdes linguistiches storiches.

»L document raprejenta n strument fondamentèl a sostegn de la comunitèdes che fèsc pèrt de la mendranzes linguistiches più picoles che l é sul tegnir de la Region – à dit l assessor Guglielmi – desche la mendranza zimbra, mochena e ladina, recognosciudes desche pèrts vives e preziouses de l’identità regionèla. L Pian l sostegn na gran lingia de projec spartii fora te sie ciampes de intervent, che tol ite la promozion linguistica e l’educazion, la valorisazion culturèla e la comunicazion e l svilup del sentiment de partegnuda e del leam col teritorie«.

De più su La Usc stampèda de en vender ai 8 de aost del 2025