La Usc di Ladins

En jebia ai 7 de aost l Consei de Ciampedel à aproà dut a una la domana de deroga per la strutura de Cercenà per n’auteza maora respet al fabricat da dant, acioche posse vegnir realisà etres doi cuerc spic: la deroga perveit de uzèr su da 11,27 m a 14,18 l’auteza a mesaria de l’ala del cuert, de la pèrt te mez. Vegnarà realisà n hotel da 82 cambres, con la SUN (spersa utola neta) smendrèda da 4742 metres cadrac a 4264 e con 5 partimenc enveze che 6; vegnarà fat bar, restorant, area wellness, nodadoa, ski room e garasc da 80 posć. La strutura sarà n hotel a 4 steiles superior, ma — descheche l é stat dit te sala do l’aproazion — l podarà doventèr ence n 5 steiles o 5s.

»L alberch, cet a Cercenà encomai da egn, l é de na sozietà che la lo à comprà al encant tras l Tribunal - à dit l ombolt Alessandro Bernard - de otober l’à domanà de aer la conzescion edilizia per bater ju e fèr su danef l fabricat«. La sozietà l é la Sporting Faggero srl con senta a Milan.
La strutura con trei spic à ciapà l benstèr de la Comiscion per la tutela del paesaje. La comiscion edilizia à valutà l projet adatà da sie pont de veduda, aproan donca la conzescion edilizia, ge dajan su ampò al Consei la domana de deroga al PRG vedù che l projet perveit na maor auteza.
»Da n pont de veduda pratich, la conzescion de chesta deroga serf a sblochèr la situazion, zenza dopièr l volum del hotel, che da na zopa de egn l é en arbandon«.

De più su La Usc stampèda de en jebia ai 14 de aost del 2025.  (Nicoletta Riz)