La Usc di Ladins

En domenia ai 10 de aost, te na giornèda de pien soreie e ciauda, la 3Esse de Soraga à endrezà la 48^ edizion de la Set Mases, la garejèda de corsa a pe de presciapech 8 chilometres dintorn paisc. Do n an che la era restèda ceta, chest an la sozietà sportiva é endò stata bona de la meter a jir e gran l é stat l suzes. I é stac en dut 286 i concorenc, che con n fers che segur no l é stat ideèl per corer, é ponté demez e rué te Pra del Preve. L percors pervedea de passèr fora per piaza Cioch, su sa Barbida, Repiciol, Sester, Ciasai, Palua, Garghele, Roisc, Toalac, Sala, Vedol, Molin e deretorn te Pra del Preve, belapontin passèr fora i set mèjes de paisc. Chest an l era ence na neva: l grop de volontadives de la 3Esse à endrezà l Ciasai Sprint, sul pont più aut del percors, a presciapech 2,5 chilometres da la partenza, l é stat metù n ‘travert volante’ e l é stat premià i doi concorenc de ic e de eles che é passé per prumes. La partenza é stata entorn les 10 da doman e do pech più che mesora l é ruà l venjidor: l spagnol Matias Mario Werther Asunción col temp de 31.46 che l ge à dat 1 menut e 20 al secondo, Mauro Balmetti e sobito do l é ruà Pietro Corradini. Sul quarto e quinto sciaier i prumes doi fascegn: Damiano Nicolodi e Luigi Sommavilla. Anter la eles enveze, en dut 109 scrites ite, beliscim prum post de la joena fascèna Gloria Gabrielli col temp de 40.07, seconda Valeria Poltronieri e terza Cristina Zana. 

De più su La Usc stampèda de en jebia ai 14 de aost del 2025  (Monica Cigolla)