La Usc di Ladins

"Vire, capí y sintí la natöra" n’é nia ma le motto che é metü fora dan la Ciasa dl parch natural a Al Plan de Mareo, mo tambëgn podessel ince ester le motto che acompagnëia le proiet "Junior Ranger", n proiet ót a mitans y mituns de 10 y 11 agn, che vëgn tigní ti parcs naturai de Südtirol, olache i jonins se mët sön tru plü iadi tratan l’isté por imparé y descurí deplü sön la natöra y la contrada demorvëia te chëra che i viun. I pici rangers n’é insciö nia ma amanc dla natöra, mo dantadöt ince ambasciadus dla natöra por le dagní.

Organisé vëgnel dal Ofize Natöra dla Provinzia, en colaboraziun cun le AVS, le CAI y chiló da nos ince la Lia da Munt Ladinia. Tratan l’isté 2025 é le proiet gnü tigní te trëi parcs naturai: Fanes–Senes–Braies; Drei Zinnen und Trudner–Horn"; en sabeda ai 2 d’agost ésera stada tan inant che an á podü surandé i diploms. Tignon cunt che al pó tó pert 15 jonins por vigni parch, án podü premié en chësc de 45 Junior Ranger nüs. La premiaziun ofiziala ê pordërt preodüda a Fodara Masaronn, daite d’Al Plan, mo deache al jutâ cuaji en chël de, ésera gnüda spostada tl salf dles manifestaziuns da La Val. I jonins é gnüs saludá danter l’ater dal vizeombolt de ciasa Felix Dapoz, dal assessur provinzial Peter Brunner, sciöche ince rapresentanc dles lies da munt che dëida organisé, danter chisc le presidënt dla Lia da Munt Val Badia Martin Schuen, sciöche ince le responsabl dla Ciasa dl parch a Al Plan Matteo Rubatscher.  (pablo)