Da chest uton sarà demò n piovan te duta Fascia, don Mario Bravin, e no l é stat pervedù nesciun colaborador stabol per arsegurèr la messes fora de sajon. La comunanza parochiala se ouc al Piscop.
Descheche oramai se sà, ai 5 de otober don Andrea Malfatti se n jirà da Fascia per jir a tor su la doi parochies a Rorei olache l é stat destinà: la messa per l saludèr sarà chel dì te la Pieif de Sèn Jan da mesa les 11 da doman. Ai 19 de otober te gejia de Poza da la does domesdì vegnarà metù te la mans de don Mario Bravin, apede a la parochies de Dèlba, Cianacei e Ciampedel, ence cheles de Mazin, Pera, Poza, Vich e Soraga.
Per enjignèr chest passaje don Mario à chiamà ite en mercol ai 10 de setember te oratorie de Poza i raprejentanc de duc i Comitac parochiai de Fascia. Cognon ge fèr front a na organisazion sperimentala, l à dit en sostanza don Mario, te Fascia gé saré soul, ajache no l é stat pervedù nesciun
colaborador stabol, e un fèsc per un. L problem – à dit amò don Bravin – no l é tant te sajon, canche te val rua semper desvalives preves che pel arsegurèr la zelebrazions, ma fora de sajon. E endèna don Mario l à metù dant demò la costion de la messes de la domenia, de cheles ti dis de laor no l é stat nience rejonà. L à dit che, se no rua nesciun colaborador, el pel dèr la desponibilità per fèr doi messes la sabeda sera e cater la domenia (e sie messes ogne fin de setemèna l é jà n muie) e l à envià i raprejentanc, spartii per gropes de paijes desferenc, a studièr fora la soluzions miores per encontentèr più che l é meso duc, tegnan cont ence del fat che la val la é longia, de spes con trafich, e a se mever anter Dèlba e Soraga ge vel sie temp.
I conc é sobito fac: con 6 messes e 8 parochies vel dir per forza che vèlch paisc restarà zenza messa de la domenia.
Se pel lejer dut su La Usc nr 36 dai 19 de setember, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer. (Lucia Gross)
