La Usc di Ladins

19-20-21 de setember, no ve cruzià, no son do che dae i numeres, endana… volee demò ve contar coche la é jita te chisc trei dis en ocajion de la fradaa anter noscia Musega da Vich e chela de San Casciano Val di Pesa-Firenze, ciolade ensema dal 1992, ajache duc doi i gropes é nasciui tal dalonc 1820. L é nasciù dut per cajo, enlauta l president Claudio Gheri, che l é amò en ciaria, l era sa Vich ghest e na bela sera d’istà l é vegnù a scutar nosc conzert e da aló, anter na ciacolada e na rejonada, apontin l é sutà fora chesta fradaa! Enbendapò en vender sera l é ruà nesc amisc e do aer fat i saluc de benvegnù, i aon paré sobito ti hotie a se fieterar ite da cena e se trar te pric par pussar fora la fadia dal viac e se enjignar le ame bone par l dì do, ajache l program pervedea na raida sa mont envers l Gardecia e l Vaiolet, tal grop del Ciadenac!

Te Gardecia e sal Vaiolet, con n pensier a Marco e Tita

»Dai che jon, le sentadoe de Pera le é jà en moto…« e coscita sion ponté demez (siane beleche de 100!) ite par l troi enscin te Gardecia e do, desche dit tal Vaiolet, pian pian… ma pian!! N picol grop l é po ben stat bon de ruar sal Gartl, chi joenec con le ame desche n ciamorc, ma dijon che i autres à ben sofià su par chi giarogn, mingol par l fers dal soreie, mingol la peamenta che se descolaa (fazile la era dal an dal doi…) ma a la fin sion rué duc ló da la utia zenza se far dal mal! Aon tirà l fià, fat na viva, parà ju l polver e dant de se n jir de retorn aon volù recordar, ló dal monument de sas, doi amisc de paisc: Marco Rason Goti e Tita Weiss dal Pech che de marz dal 1991 i à pardù la vita sot na lavina, bele ló vejin. N moment de reflescion e manconia ajache Marco l era maester da la Musega da Vich e Tita menacrep de nonzech!

Podede lejer dut l articol su La Usc stampèda nr 37 de en vender ai 26 de setember. L sfoi é da poder comprèr ence te la boteighes de sfoes.  (Ivan Pederiva de Vigìle)