La Usc di Ladins

I spazies espositives del storich Granaio de Nomi se à empienì fit e toch de jent en sabeda ai 27 de setember per l’inaugurazion de la mostra del cognosciù artist Adolf Vallazza dal titol ‘Arcaismi’.

L artist da Ortijei à tanche compì, più avisa ai 22 de setember, la bela età de 101 egn e chest’outa l don l ge l à fat el enstes al Comun de Nomi e al Trentin con sia prejenza en ocajion de l’avertura de la mostra e con sia operes metudes fora en esposizion. Na ventina de scultures anter totem, megaliti, statues de omegn, femenes e ucie te na forma astrata e trons. Vallazza, sentà ju sun n gran scagn te mez a la sala, l é stat cercenà de jent che volea l saludèr, ge fèr i augures, i complimenc.
L ombolt de Nomi Alessandro Riolfatti, do l salut de benvegnù, l à volù rengrazièr chi che se à dat ju per endrezèr l esposizion. »Chesta mostra se met ite te na lingia de autra mostres endrezèdes con l’Aministrazion da inant, en particolèr con l ombolt Rinaldo Maffei. Sion n teritorie de confin ma sion ence tel cher de l’Europa. Chesta mostra é emportanta per Nomi e per l’autra comunitèdes percheche fèr cultura vel dir creèr valor, renforzèr l sens de partegnuda e se verjer tras n dialogh consapevol e na veièda sorafora i confins.«

Dut l articol su La Usc de en vender ai 3 de otober del 2025

 (Monica Cigolla)