La sociazion envia sozi e amisc a la Festa de Rengraziament en domenia ai 19 de otober a Poza e a Soraga.
L é n bel cedean toron chel che festeja chest an l’Union di Ladins de Fascia. La sociazion, metuda su ofizialmenter con at del notèr Giovanni Rizzi ai 19 de mé del 1955, vèrda con sodesfazion al travert di 70 egn de storia. Nience da dir cotenc che l é stat i vèresc arjonc te chisc egn, i obietives metui dant, la ativitèdes, la radunanzes, la publicazions: dut cant col didament, la bona volontà, la gaissa e l idealism de conseieres e volontadives che te chisc egn ge à stat apede a la sociazion. L spirit l é semper stat chel, vèlch an più gaert e feruscol, vèlch an magari più sopì, ma semper con chela de defener e rencurèr l patrimonie comun de rejonèda, cultura, tradizions e unità anter i ladins storics del Sela. Te chisc
egn l’Union di Ladins se à dat ju te desvalives ciampes: da chel politich e culturèl, a chel scientifich e linguistich. L’à sapù se adatèr ai tempes che cor en prescia, che muda ceves e endrez, sentiment e partegnuda. La se à fat lèrga te la scola, ti media, ti social e ence te la gejia. La é ruèda apede ai picoi e ai gregn, semper con chela de lascèr na semenza che cresce e dae fruc, tel solch lascià da nesc aves, sul troi avert dai militanc ladins.
Per recordèr la storia, i ejic arjonc e duc chi che se à dat ju per l’Union di Ladins vegnarà endrezà n moment aldò più inant. Ades l é l moment de fèr festa e de se troèr duc ensema en ocajion de la tradizionèla Festa del Rengraziament. En domenia ai 19 de otober l’Union se jonta ite a la messa endrezèda dai comitac parochiai de la parochies de la Val de sot per ge dèr l benvegnù a don Mario Bravin, da les 14:00 te gejia de Poza. Dapò se se tramudarà te La Gran Ciasa a Soraga olache entorn les 16:00 sarà vèlch curt descors, la premiazion del concors Let’s stick ladin! e aperitif con cena, e dapò musega da bal per duc con I Pazedins. L’Union di Ladins ve speta per festejèr duc ensema.
