La Usc di Ladins

Chi erel Daniel Zen? Nasciù a Vich del 1584, l é doventà Vescof de Persenon del 1627, prum e soul Prinz Vescof ladin te passa mile egn de storia del Prinzipat de Persenon. Sobito l se à troà a cogner tor dant i prozesc contra jent de Fascia, cusèda de strionarìa, e l é mort demò 17 meisc do, de 44 egn, de n mèl no cognosciù. 
L é entorn a chesta storia, anzi entorn a doi stories, chela de Daniel Zen e chela de Dorothea de Freina, la femena che simbolisea duta la femenes cusèdes de strionaria te la storia, che se dejouc la trama leterèra del liber »I misteri del Cjaslir. Storia di un santo vescovo e di una presunta strega«, roman storich scrit da Fabio Chiocchetti e vegnù fora del 2013 per l’editor Curcu & Genovese. Chest liber l é stat prejentà en jebia ai 16 de otober fora Ciavaleis tel chèder de la rassegna culturala dal titol »Di erbe, streghe e dee«, metuda a jir da la sociazions ‘Terre Altre’ e ‘ION’, en colaborazion con ‘La voce delle donne’, e col sostegn del Comun de Ciavaleis e la Biblioteca e de la PAT.
»I misteri del Cjaslir« l aea abù n gran suzes, con na seconda edizion, la segnalazion al pest Mario Rigoni Stern e l sostegn de l’Union di Ladins de Fascia per sia valita culturala e per la scomenzadiva del autor che aea destinà sie vadagn sui libres venui al restaure del retrat ofizial de Daniel Zen, che à coscità podù vegnir metù fora tel Museo Ladin de Fascia.
L liber l é amò a la leta, se pel l domanèr a Sèn Jan te la senta de l’Union e ence te l’Istitut Cultural Ladin.

Se pel lejer dut su La Usc nr 41 dai 24 de otober, che se pel troèr ence te la boteighes de sfoes. Sul sit www.lausc.it se per fèr l abonament al e-paper per aer azes vigni vender a dut l sfoi sul fonin, tablet o computer.


 (LG)