La Usc di Ladins

»Stimà ombolt, stimé assessores e conseieres, develpai de ne aer volù chiò te chesta sala olache vegn tout dezijion emportante per duta la comunanza.« Con chesta paroles Nicole Oberthaler, studenta de la II D de la scola mesèna de Sèn Jan, à tacà via con mingol de emozion sie prum descors da neva ombolta joena de Sèn Jan, prejentan sie program e sia squadra de aministradores. L é sozedù en mèrtesc ai 5 de mé, do che i Conseieres de Sèn Jan à aproà ofizialmenter la costituzion del nef Consei de Comun di bec e de le beze.
Che fossa stat na sentèda dassen spezièla se l à entenù sobito: no sozede de spes che te n Consei de Comun la sala sie piena e rèsa de jent, e amò più fora de anter l é che l'età mesèna del publich sie sot i 14 egn. A averjer i intervenc, duc per ladin, l é stat l president del Consei Cesare Bernard, che con na emozion amò maora che chela de la neva ombolta ge à dat l benvegnù ai prejenc. Bernard à palesà sia legreza per chest enteres di joegn per la vita del Comun, e l à ence sotrissà l segnificat de la data de chest Consei, recordan a duc en curt coche ai 5 de mé del 1920 l era nasciù la bandiera ladina.
Ma co él nasciù chest Consei tant fora de anter? Dut é peà via da l'assessora a la cultura del Comun, Mirella Florian, che la se à dat ju per meter a jir l projet 'Sentadins se doenta'.

Podede lejer dut su La Usc dai 15 de mé da ciapèr te la boteighes de sfoes de la valèdes ladines o tras abonament (info:www.lausc.it/abo o abo e-paper)


 (Lucia Gross)