La Usc di Ladins

En lunesc ai 3 de aost te Piaz Marconi doi oujes del alpinism fascian é states protagonistes de la sera »Da la Dolomites a la crepes del mondo« endrezèda da la sezion Cai Sat de la Val de sora. Con la moderazion de Giorgio Pedron, Sergio Valentini e Fabrizio Defrancesco, duc doi sozi Sat e Ciamorces de Fascia, à contà de sie leam con la mont, de valores, mentalità e identità. L é stat n dialogh de pascion e no demò n biot ascenjions, la mont é stata contèda desche n lech de enconter.

La sera é stata averta dal salut de la vizepresidenta Licia Favé e da la paroles del president SOSAT Luciano Ferrari, sociazion che de mé à premià Valentini con l Ciodo de or, recognosciment emportant no demò per sie valor alpinistich, ma ence per l’etica e l spirit de la persona.

A dita de duc e doi i alpinisć, l é la curiosità una de la rejons che spenc na persona a jir sa mont, viver de neva esperienzes e cognoscer de neves lesc. Che ensegnela la mont? Defrancesco: »La mont domana respet, disciplina, capazità. I elemenc naturèi te segna tel fon, ma i te dèsc ence gran autentizità«. E amò Valentini: »Sacrifize, pazienza, coraje, lezions che fèsc pèrt de la natura umana. Chi che é bon de i rejer, à na gran sodesfazion a la fin de la dì e te la vita«.

De più tel articol su La Usc stampèda de en vender ai 14 de aost del 2026.


 (NICO)