La Usc di Ladins

L é stat enaudà enstadì te Museo Ladin de Fascia »Melaures de la mendranzes«, na mostra artistica embastida via da la Region Trentin Sudtirol per ge dèr luster a l’èrt ladina, mochena e zimbra, pissèda en colaborazion col Istitut Ladin de Fascia, l Bersntoler Kulturinstitut, l Kulturinstitut Lusérn e l ICL Cesa de Jan. La é jà stata prejentèda te Palaz de la Region a Trent a la fin de firé per la pruma Dì regionèla per la mendranzes linguistiches.

Endèna la conferenza stampa vidèda da la diretora del Istitut Sabrina Rasom, à portà sie saluc la presidenta Tea Dezulian e l assessor regionèl Luca Guglielmi. Duc é doi à uzà fora la vitalità e la pluralità culturèla de la mendranzes e apede l’emportanza de la memoria.

L é stat dapodò l responsabol de la operes d’èrt de la Region Giuseppe Tasin, curador de la mostra, a tor la parola: »L’idea per l percors espojitif era jà nasciuda acà cater egn, ma demò de firé l à ciapà vita. L obietif l é portèr sul teritorie l recognosciment de noscia mendranzes linguistiches«. Te Sala Heilmann l é stat metù fora en dut 71 operes, metà fora dal patrimonie de la Region e l’autra pèrt dai magasins del Museo Ladin.
La mostra te Museo Ladin la é averta fin ai 27 de aost vigni dì dadoman da les diesc fin da mesdì e da les cater fin les set da sera, de sabeda l é serà.

De più tel articol su La Usc stampèda de en vender ai 14 de aost del 2026

 (Nicoletta Riz)