La Usc di Ladins

No la ge à scusà nia deldut la resposta a l’interogazion su la Cèsa de la Comunanza a la conseiera del Grop Mescedà del Comun General de Fascia Mirella Florian. Pec dis do defat, e più avisa ai 3 de aost, la ge à portà dant na mozion a la presidenta del Consei Tea Dezulian e al procurador Edoardo Felicetti per domanèr che l CGF sostegne con dezijion la domana de classifichèr la Cèsa de la Comunanza de Fascia desche Hub e no desche Spoke descheche l é stat pervedù da la Provinzia de Trent. »La sanità l é n derit fondamental e l cogn vegnir garantì a na vida medema ence ti teritories periferiches e da mont, soraldut canche la distanza dal ospedal raprejenta n fator critich« disc la conseiera Mirella Florian.

Na mozion da aproèr ence ti Consees de Comun

Con la mozion Florian domana che l CGF se fae inant con la Provinzia de Trent per domanèr l status de Hub; che l se dae ju per aer na posizion unitara de la val col ge domanèr l’aproazion de la mozion te duc i Consees de Comun e che dapò ge vegne manà formalmenter chesta posizion a la Provinzia; de tor ite, travers l Consei de la sanità, i dotores de medejina generèla, i dotores dai bec e i spezialisć che laora sul teritorie, a na vida che i posse dèr sie contribut calificà a la definizion del model de endrez più adatà per la Cèsa de la Comunanza te n sistem de val; che vegne informà a do a do l Consei general su la azions envièdes via, sui ejic di confronc istituzionèi e su la proponetes de revijon del model organisatif sanitarie de la val.

De più su La Usc stampèda de en vender ai 14 de aost del 2026



 (MCI)