La Usc di Ladins

Les é states n muie la emozions vivudes endodanef, a veder i momenc più bie de la garejèdes endèna la Olimpiades Milan-Cortina 2026, ma soraldut a scutèr la testimonianzes di protagonisć. En jebia ai 6 de aost, tel chèder de la rassegna ‘Cianacei Campo Base’, l é stat endrezà te Kino Marmolada n moment dedicà a trei Olimpionics. Sun paladina Chiara Mazzel, schiadora paralimpica da Vich, te anter a Andrea Giovannini da Piné, atlet che fèsc velozità sui feres e Lucia Dalmasso che fèsc brea, la é da Falciade ma mingol ence leèda a Fascia ajache si genitores che é arcedadores de schi i à lurà per più egn col Ski Team Fascia e col Ski College. Duc trei à vent medaes a la Olimpiades.
I trei olimpionics, domané fora da Elisa Salvi e Mattia Valentini, à contà di momenc più bie de chest gran event sportif stat vejin a cèsa, de la emozions che i à proà canche i é stac premié sul podie e i à ciantà l in talian, de la fadia de la gares, di momenc spartii con i compagnes de squadra e con i aversaries e de chi de legreza vivui con la familia.
Chiara à metù al luster l bel de aer l publich al travert percheche te la garejèdes de schi paralimpich per solit no l é publich e chest l fèsc dassen na bela desferenza. »Spere che ades la jent ne stae do mingol de più e che la seghite a ge vardar a le gare di atlec paralimpics« l’à dit.

De più su La Usc stampèda de en vender ai 14 de aost del 2026  (Monica Cigolla)