La Usc di Ladins

Puntual  co la fin de november, tourna nta Fodom, »Ra Filodramatica d’Anpezo«. L’apuntament, metù a jì n colaborazion co l’Union Ladins da Fodom e l patrozinio del Comun da Fodom l é pervedù per sabeda ai 25 de november da le 20:30 ntel Self dei Congresc. L toch de teater che i portarà sto ann l é ntitolé »El morto in ciasa« e a despét del titol enveze l é na comedia duta da ride dal prum al ultimo menuto. De la storia no se pò dì nia davántfora. Se sa ben, ulache l é n mort, co la sua vëdua, no dut va coche se pò se pensé. L test l é sté outé per ampezán da Fiorenzo Gaspari »Leon« co la regia  de Roberto Zambelli »Nichelo«. La pruma de chëst nuof laour l’é stada nchëstadì ai 15 de november a Cortina a l’Alexander Girardi Hall, con repliche che jiarà ennavánt fin a miercoi ai 22. Chëla de Reba spò, come da tradiziona, sarà la sëra che siera ite la stagion teatrala che, come ogni outa, per Ra Filodra­matica, l’é n suzéss garantì. I bilieti i costa 10 euro, debann per i tosac fin a 12 agn e se pò i compré davánt­fora a la Cassa Raiffeisen de la Val Badia de Reba, ntel fin setemana, al Garnì Royal de Reba (tel. 043679293) o la sëra davánt del spetacol a l’entrada.