La Usc di Ladins

Nta Fodom, come nte la maiou pert dei pichi paisc da mont, nte sti ultimi agn i é stade trope le boteighe che a saré davoche i vegli paroni i é jus en pensción perciéche degugn a porté ennavánt l’ativité. Le motivazion i é chële che oramei se cugnësc. Le picole boteighe da mont le no n a plù reditivité gauja che ntei paisc l é tres mánco jent, le coute e i cosć de gestión auc ela concorenza dei zentri comerciai, oramei tres plù damprò da podei rué perméz nte puoch temp co l’auto ulache i priesc i é cotánt plù basc. L’é na notizia spò, pojitiva emprumadeudt per la comunité, cánche na boteiga la passa de mán enveze de saré. L é l cajo de »La Papaya«, che vën fruta e verdura ntel local del Zenter Servisc de Reba. Na realté empé da cuaji 30 agn che sporsc un de chi servisc emportánc per n paisc da mont e turistich. I fondadous e storizi gestori, Rinaldo Dal Pont e Flavia Denicolò co la fin del ann i jiarà n pensción. Ma per na bona al orizont l é bele na nuova gestión enjignada a tignì dalviert. Se trata de doi jovegn da Digonera ma de reisc fodome, Mattia e Alan Baldissera, fioi de Massimo de la Giacomina »Bortolata« da Davedin e de la Annamaria de »Nani Postin« da La Plié.
Ruei al traviert de la pensción, con Rinaldo tournón ncin ndrio ntel temp per conté de coche i é stei chisc agn de laour davò n bánch a vëne salata, naránze e …papaya.
L eva del 1996 e mi e mia fëmena Flavia vivónve a Mel, ulache da zirca 10 agn gestìve bele na boteiga proprio de fruta e verdura Per chëst l enlouta vizecapocomun Leandro Santin l n’ava contaté per ne damané se no n onse nia bu entenzion de se tramudé co l’ativité sa na Reba dato che s’ava liberé n local ntel Zenter Servisc de Reba ulache l eva na boteiga dai ciof. Mi, a di la verité, no n eva deguna entenzion. Ma pò è capì che mia fëmena la fossa tournada gënn nta Fodom e coscita n’on descorëst e on dit, provón. L Comun l a fát l bándo per dé su l local e l on vadagné nos ence perciéche degugn de autri s’ava prejenté. On laoré fora l local, fat ite l aredament e davò nvalgugn meisc giourì l’ativité«.
Co ela stada a pié via?
»L dì che on fat l’inaugurazion, l 24 de jugn del 1996, l ava fat ju diesc schei de nei. E m’è delongo pensé, mah, chilò no pión via proprio polito ( l se la rì ). On vedù delongo coche la va: n stagión se laora dassën. Fora stagión l é l laour de n pico paisc da mont.

Deplù te la edizion dl 15 de dezember.