La Usc di Ladins

Reinhold Bernardi à cun la Lia di Ciambonfs, de chëla che l ie stat truep ani presidënt, fat truep per i manco fertunei de nosta valeda. Heinz Santifaller de "Sustëni ala Vita" se lecorda de ël.

Per truep ani à Reinhold Bernardi dat si sustëni tres la Lia di Ciambonfs ala lia Sustëni ala Vita, dantaprima metan a jì per ani alalongia deberieda cun si lia la festa da Nadel per "Sustëni ala Vita", chël àl for fat cun gran legrëza y cialan de njenië ca dut a puntin y drët bel y bon. Uni ann iel garatà na bela festa che ti purtova truepa cuntentëza a tanc che univa a festejé pea. "Reinhold à daniëura desmustrà si bon cuer, si respet y umanità de viers di autri y l ie stat bon de l dé inant a duc nëus." Nsci dij l presidënt dla lia Sustëni ala Vita, Heinz Santifaller, de Reinhold Bernardi dl Fever de Sëlva, che ne n'à nce no mei schivà fadies canche la se tratova de ti judé ai autri. Ntan i mënsc da d'instà metòvel pona a jì uni ann la jites y spaziredes per persones cun handicap, che fova scialdi bënuludes y ulache trueps jiva for pea gën. Si bona ueia y ch'la maniera de se lascé savëi bel se spidlova te chëi che jiva pea cun ël y i ntujiasmova per la natura y per l jì a pe, nsci Santifaller: "L ie stat propi na "gran" persona, che se à dat da fé per l bën dla cumenanza."

Heinz Santifaller lascia al savëi nce a inuem de Sustëni ala Vita che l ie da muië che Reinhold ne n'ie nia plu danter nëus y che l ti mancerà dassënn a duc. L ne resta auter che tò cumià y l rengrazië per l tëmp, l amor y la legrëza che ël ie stat bon de dé, speran che l ti vënie retù cassù, da Chël Bel Die.

Ulrike Maierhofer

FOTO Reinhold Bernardi (a m.dr.) deberieda cun l presidënt dla lia Sustëni ala Vita pra la festa de S. Miculau y da Nadel che vën metuda a jì uni ann.