Coronavirus: vijita isituziunela de Thomas Widmann

Data

02 de jugn 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
N juebia dl’ena passeda iel unit adalerch tl Zënter de Prim Aiut de Soplajes na delegazion cun l assessëur Widmann y l diretëur dla Sanità Florian Zerzer per ti cialé coche la va cun la nrescida n con’ dl coronavirus permò nvieda via. Prejënc nce i ambolc de Gherdëina.

Coche repurtà te La Usc di Ladins se tràtel, pra la nrescida epidemiologica te Gherdëina n con’ dl Covid-19, la malatia gaujeda dal coronavirus nuef, de na scumenciadiva deberieda dl Assessorat provinziel per la Sanità, l’Azienda Sanitera, l Astat Istitut de Statistica de Südtirol, l’Academia Europea Eurac yl Istitut provinziel de Medejina Generel.

Test per trëimile persones
L ie unì cris ora 3.000 persones de Gherdëina dal Astat, l Istitut provinziel de Statistica. L se trata de na proa scialdi reprejentativa dla jënt de Gherdëina, de duta la fasces d’età di luesc dla valeda. A duc chëi che ie unii crisc ora ti vëniel fat na proa dl sanch y l tampon tl nes y tl col. Leprò vëniel mo fat na na tueda y nrescida genetica, per abiné ora – almanco spèren-, sce l ie danman elemënc o fatores de scunanza, de prutezion, o, al incontra, de risia sibe per giapé la nfezion, che per s’amalé plu o manco sceriamënter.

"Fajëde duc pea!"
Bele n merdi de chëst’ena passeda àn scumencià cun 300 tests al di, che ie unii y vën inant mandei inant te labores spezialisei. Trëimile tests ie na cumpëida scialdi granda, defin relevanta dal pont de dududa dla statistica. Per Gherdëina uelel chël dì che uni terzo ie nvià a fé pea. Propi perchël se damanda i respunsabli mo n iede tres La Usc di Ladins de ti mëter a cuer a duc de fé pea pra chësta nrescida. Widmann: "Mo n iede n rengraziamënt de cuer a dutes y duc che fej pea!"

David Lardschneider

FOTO: N ucajion dla vijita istituziunela te Gherdëina dl assessëur provinziel per la sanità Thomas Widmann y dl diretëur dla Sanità Florian Zerzer: autoriteies y cunlauradëures tl Zënter de Soplajes.