La Usc di Ladins

La setima edizion dla Bienela Gherdëina ie tlo! Chësta edizion ie sambën carateriseda dal mumënt particuler te chël che vivon y sotrissea l cuntat danter plu nazions nce canche n ie dalonc.

Truepa melsegurëza iel stat ntëur ala manifestazion dla Bienela Gherdëina chëst ann, tl tëmp dl lockdown y tla enes do. N ne savova pu nia sce la fossa jita fata a udëi inò i lëures artistics tl zënter de Urtijëi o no. Da coche dij l ambolt de Urtijëi Tobia Moroder pra la giaurida tl zënter dl luech n sada ai 7 d’agost "fossa la dezijion plu scëmpla dessegur stata chëla de ne fé nia la Bienela chëst ann. Ma ala fin dla finedes iel unì tëut la deizijion de la fé, y son dla cunvinzion al cënt per cënt che on fat drët!" L ambolt sotrissea nce che l ie stat puscibl tò chësta dezijion, ajache la particularità dla manifestazion ie pu chëla de vester tla lerch publica, a despusizion de duc.

Dai cin’ artisć nchin ala nternaziunalisazion
La presidënta dla lia Zënza Sëida che mët a jì la Bienela Gherdëina, Doris Ghetta, lecorda cun stolz coche l proiet ie nasciù tl 2008, y duta la streda che ie unida fata ti ani da dedò: "Dut à scumencià te si pitl. Tla prima edizion dan dodesc ani ans abù cin’ artisć dla valeda. Pona ie l proiet chersciù for plu y plu, cun artisć y artistes da dlonch caprò. Tl 2016 ons pona "davanià" l curadëur polach Adam Budak, che nes à judà a purté la Bienela a n livel plu aut y nternaziunel." Propi l curadëur Budak à sotrissà coche l se trata de na edizion speziela, cun passa trënta danter artisć y artistes de dut l mond: da Vancouver nchin Vilnius, da Bangkok nchin Los Angeles, dal Portugal nchin te Gherdëina y mo scialdi deplù.

L articul ntier tla edizion stampeda de La Usc di 14 de agost.

Bruno Maruca

Foto: Pra la giaurida dla Bienela Gherdëina 2020. D.m.c.: l architet Igor Comploi, la presidënta dla lia Zënza Sëida Doris Ghetta, la muderadëura Sabine Gamper, l curadëur Adam Budak, Lodovico Comploj, l assessëur provinziel Daniel Alfreider, l assessëur regionel Manfred Vallazza y l ambolt de Urtijëi Tobia Moroder (foto: T. Sorvillo / L. Guadagnini).