La Usc di Ladins

A Gudon, n pitl luech dla val de Isarch, danter ciastiei y viles, luesc de cult y verzons, iel n dumënia ai 16 de lugio unit a s'l dé per l cuinto iede la "Kulturmeile Gudon". Trënta artisć y artistes à metù ora si opres d'ert te lueges defrëntes, do n percurs che piova via dal ciastel Summerberg menan tres la stredes y i ciantons ascundui dl pitl paesc. I vijitadëures pudova nsci ti cialé al'opres y nce s'la ciaculé cun i artisć, che fova dut l di iló per ti spieghé a duc i nteressei si scultures, pitures o fotografies. La cossa particulera ie che la mostra ie mé davierta per un n di, dala diesc daduman ala set da sëira, y che la vën mé fata sce l ie bel tëmp.

Danter i artisć che à fat pea n fòvel nce diesc de Gherdëina: l fotograf jëunn Damian Holzknecht, i scultëures Wilhelm Senoner, Armin Grunt, Otto Piazza, Roland Perathoner, Hans Rabanser y Ivo Piazza, i pitëures Christian Holzknecht – STL, Roland Moroder y Sigmund Holzknecht. Nce Lothar Dellago, che ie nasciù te Gherdëina, ma che vif śën a Barbian, à metù ora si lëures a Gudon.

L articul ie da liejer tla edizion de n vënderdi de La Usc di Ladins

Elisabeth Kostner