La Usc di Ladins

L gran temporal che ie stat inier domesdì, n merdi ai 19 de lugio, à nce fat danns te Gherdëina. Dantaldut te Sëlva ie i destudafuech unii cherdei per deplù ntervënc.

L gran vënt à sturcià truep lëns te Sëlva, dantaldut sun l custon de viers de Ciampinoi y da Val ite. N lën ie sturcià sun la corda dla furnadoia de Ciampac, ma davia che d'instà iéla śareda ne n'iel per fertuna stat degun pericul per la jënt. I Destudafuech de Sëlva ie unii cherdei per deplù ntervënc, coche nes conta l cumandant Toni Mussner: "Sun la streda danter Plan y Plan de Gralba, sota Merch, fòvel n lën te streda y chël ons messù jì a rumé su, davia che l fova bele na gran culona de auti che ne pudova nia passé." N ie nce unii cherdei sa Fussel, tl raion da Frëina, ulache l vënt ova zarà ju plates de n tët. I destudafuech à bel riesc curì ju l tët dla cësa. "Pona ons mo messù jì amanonder te duta Sëlva a ndrezé su deplù sieves de cantieres che fova drusedes," nsci l cumandant. Nce ta La Poza à l vënt fat vel' dann: te na luegia ie cherpei via i cabli dal telefon y deplù lëns ie unii sturcëi. Y pona nce mo dal Hotel Oswald, ulache i destudafuech à messù tò ju la piza de n ciampanil, ajache la manaciova de tumé sun streda.

A Santa Cristina ie i destudafuech da sëira unii cherdei dal spion dal bosch. Sun l troi danter Ciaslat y Prënsa fòvel deplù lëns drusei. I Destudafuech de Santa Cristina ie nsci jic a i rumé su y n possa ncuei (ai 19 de lugio) inò passé sun l troi cun la roda y a pe.

Nce i Destudafuech de Runcadic à messù jì a rumé su n doi lëns che fova sturcëi sota Cuntruni, sun la vedla streda danter Runcadic y Bula.


Elisabeth Kostner