La Usc di Ladins

Nsëira y ntan l'ultima nuet ie i destudafuech dla valeda unii cherdei per de plu ntervënc. L majer dann à la gran plueies povester fat via n Setil, ulache l ie unit ju na smueia. Sëura Furdenan, nia dalonc dal ressevar, iela mueta, menan ega, sasc y mauta nchin ju n Setil. Iló ova i lauranc de Chemun de Urtijëi bele metù ora l fonz per fé la dlacia da jì cun i jadins via per l inviern. La plaza ie śën curida de mauta y n ne sà mo nia sce n sarà boni de la rumé su. N ne sà nce mo nia sce la ie mo da pudëi adurvé. Sun la luegia ie unii cherdei i Destudafuech de Runcadic, che ova bele dant fat n ntervënt ora Runcadic, ulache l'ega de n tumbin ie jita persëura y ie regorsa ite te na cësa.

L Derjon ie jit persëura
Nce ora Runcadic, dal hotel Croce d'Oro, àn cherdà i destudafuech ntan l ultima nuet. Per gauja dla gran plueia ie l Derjon jit persëura y nsci à i Destudafuech de Urtijëi messù mëter ora sac de sablon y de gran petons per fermé su l'ega. Coche nes à spiegà l cumandant di Destudafuech de Urtijëi Christian Stuffer àn per ntant lascià iló i petons y i sac, davia che nce n juebia che vën dëssel aldò dla previjions inò pluei dassënn. I destudafuech de Urtijëi fova de nuet nce a cialé do la situazion di autri ruves tl luech.

Doi ntervënc sun Pana y de viers de Frea
Ntëur mesa la undesc de nuet à nce i Destudafuech de Santa Cristina messù muever per furné sun Pana, ulache n ie stac duta la nuet a pumpé ora ega de na garage. Canche l à lascià de pluëi iela inò jita y nà pudù stlù ju l ntervënt.
I Destudafuech de Sëlva ie daduman furnei de viers dl Jëuf de Frea, ulache puech sot ala ustaria Gerard ie unida ju na pitla smueia, che ova nce smagià la tiera sot al dlander de streda ora. N à nsci messù mëter su na banda per raidé demez l'ega, a na maniera che la smueia ne vënia nia majera.

Elisabeth Kostner