La Usc di Ladins

Pra la senteda dl Cunsëi de Chemun de Urtijëi de n lunesc de chëst’ena àn scumencià cun la ufizialisazion de na mudazion dl Cunsëi. La cunseliera dla Lista Unica Irene Kostner à dat la demiscions per rejons persuneles. »Irene ie jita n ann oradecà, perchël ne fóssel nianca stat mesun a unì ala sentedes. L nes desplej ajache l ie stat na bona cunlaurazion, ma l ie nce drët che la ebe tëut chësta dezijion«, à dit l ambolt Tobia Moroder. La cunseliera che à tëut si lerch te Cunsëi ie Martina Leitner, economista y oma, che ie trapineda tl 2011 a Urtijëi da Funes.
Pra l pont numer cinch dla senteda jìvela de dé pro na mudazion al Plann urbanistich. L ambolt Tobia Moroder: »Te chësta legislatura ie chësta una dla delibres plu mpur­ tantes da fé. De chëla delibres che muda propi la storia de n luech, a ti cialé al daunì lonch, n iel mé pueces, y chësta ie una de chëles. Rate che chësc posse vester de gran vantaje per la populazion de Urtijëi«. L prim zitadin à paredlà la cuestion dla Plaza de Sant Antone zënza curieres a chëla dl raion da jì a pe, ulache nia puecia jënt fova de contra te n prim mumënt, ma al didancuei ne savëssen nia plu da se nmaginé l luech zënza chël raion nsci. »Tl 2016 ons cialà coche n pudëssa ti dé mo plu cualità al raion da jì a pe, co tò ora l trafich da Plaza de Sant Antone«, nscila Moroder, che rejona de spusté la stazion dla curieres de viers dla Tresval, de avëi na plaza liedia dal trafich d’uni sort. 

Deplù tla edizion nueva de La Usc di Ladins.

Bruno Maruca